MKUU WA WILAYA AFANYA ZIARA KUSIKILIZA NA KUTATUA KERO ZA WANANCHI

Posted on: June 17th, 2025

Mkuu wa Wilaya ya Singida, Mhe. Godwin Gondwe, amefanya ziara ya kikazi pamoja na Kamati ya Ulinzi na Usalama katika vijiji mbalimbali vilivyopo ndani ya Kata ya Ngimu na Mughunga kwa lengo la kusikiliza na kutatua kero zinazowakabili wananchi.Katika ziara hiyo, wananchi walipata fursa ya kuwasilisha changamoto zao moja kwa moja kwa Mkuu wa Wilaya. Aidha, elimu kuhusu utunzaji wa misitu na faida zake ilitolewa kwa wananchi, ikiwa ni sehemu ya juhudi za serikali za kulinda mazingira na kuhamasisha maendeleo endelevu.

Akizungumza na wananchi hao, Mhe. Gondwe aliwasisitiza kuendeleza utamaduni wa kudumisha amani, akiwakumbusha kuwa ni urithi muhimu uliopatikana kwa juhudi kubwa za wazee waliotangulia.

“Nawapongeza sana wazee wetu kwa amani tuliyonayo, hivyo basi ni wajibu wetu sisi kuitunza amani hii kama walivyofanya wazee wetu.” alisema Mhe. Gondwe.

Ziara hii ni sehemu ya utaratibu wa serikali kuwafikia wananchi moja kwa moja, kusikiliza matatizo yao na kuhakikisha huduma bora zinawafikia wakazi wa maeneo ya vijijini.