MSTAHIKI MEYA WA MANISPAA YA SINGIDA ATOA PONGEZI NA MAPENDEKEZO KWA HALMASHAURI YA WILAYA YA SINGIDA

Posted on: January 25th, 2025

Mstahiki wa Manispaa ya Singida, Mhe. Yagi Kiaratu, ameipongeza Halmashauri ya Wilaya ya Singida kwa juhudi zake za kufanya tathmini ya maeneo ya mabwawa ya Masogweda, Kisisi, na Mwaighimbi. Aidha, ameshauri kwamba ni muhimu kutoa elimu kwa wananchi ili waweze kufahamu mbinu bora za kutunza mazingira katika maeneo ya mabwawa hayo, hatua ambayo itasaidia kupunguza uharibifu unaoendelea kufanyika.

Pamoja na pongezi hizo, Mhe. Kiaratu ameisifu halmashauri kwa mpango wake wa kuanzisha misitu ya nyuki, akieleza kuwa mpango huo sio tu utaimarisha uhifadhi wa mazingira, bali pia utasaidia kuongeza kipato kwa jamii kupitia uzalishaji wa mazao ya nyuki. Amehimiza ushirikiano wa wadau wote katika kutekeleza miradi hiyo ili kufanikisha maendeleo endelevu ya mazingira na jamii kwa ujumla.

Mhe. Kiaratu alitoa kauli hizo Januari 24, 2025, wakati wa Kikao cha Kamati ya Ushauri ya Wilaya (DCC) kilicholenga kujadili utekelezaji wa mpango wa bajeti wa mwaka 2023/2024 na mpango wa bajeti wa mwaka wa fedha 2025/2026. Kikao hicho, kilichofanyika katika Ukumbi wa Maktaba ya Mwenge Sekondari, kilihusisha Halmashauri mbili za Wilaya ya Singida, yaani Halmashauri ya Manispaa ya Singida na Halmashauri ya Wilaya ya Singida (Singida DC).