RC SINGIDA AMTUA MAMA NDOO KICHWANI

Posted on: November 11th, 2023

Mkuu wa Mkoa wa Singida Mhe. Peter Joseph Serukamba ametembelea kijiji cha Mughunga kilichopo kata ya Mughunga iliyopo H/W Singida na kukagua mradi wa maji unaotekelezwa na Mkandarasi Universal Construction Co. Ltd.

Mhe. Serukamba amejiridhisha na utekelezaji wa mradi huo ambapo aliweza kupita kwenye DP na kujionea upatikanaji wa maji.

Aidha upatikanaji wa maji safi na salama katika kijiji cha Mughunga limekuwa ni jibu la kero ya muda mrefu ya wananchi wa kijiji hicho ambapo ukamilishaji wa mradi huo ni mwendelezo wa nia thabiti ya Mhe. Dkt. Samia Suluhu Hassan Rais wa Jamhuri ya Muungano wa Tanzania katika kuhakikisha anamtua mama ndoo kichwani na hivyo kurahisisha upatikanaji wa maji safi na salama kwa wananchi wakati wote.

Mradi huu uliotengewa kiasi cha Shilingi milioni 524 Umehusisha ujenzi wa Nyumba ya Mashine na Uzio, Ufungaji wa paneli za Sola 20 zenye uwezo wa Watts285 kila moja na pampu, uchimbaji wa mitaro na ulazaji wa mabomba ya Maji yenye urefu wa kilometa 10.7, ujenzi wa vituo 7 vya kuchotea maji, ujenzi wa mambo wa kunyweshea Mifugo na Ujenzi wa Tank la kuhifadhia maji lenye ujazi wa Lita elfu 90 juu ya mnara wa mita 6.
 
Akiongea baada ya kujiridhisha na utekelezaji wa Mradi huu Mhe.Serukamba amemshukuru Rais wa Jamhuri ya Muungano wa Tanzania Dkt Samia Suluhu Hassan kwa kuwajali Wananchi wake kwa kuendelea kutoa fedha kwa ajili ya ujenzi wa miradi ya maji    amewataka wananchi wa Kijiji Cha Mughunga kuchangamkia fursa ya kuvutiwa maji kwenye majumba Yao kwa gharama kidogo.

Mradi huu utawanufaisha Wananchi wa Kijiji Cha Mughunga na wale wa maeneo ya jirani zaidi ya watu 3500 kwa kupata huduma ya maji  safi na salama.Aidha Mifugo zaidi ya 2700 watapata maji safi ya kunywa kupitia mlambo wa kunyweshea mifugo