SINGIDA DC YAUZA TANI LAKI 248 KWA MFUMO WA STAKABADHI GHALANI

Posted on: September 9th, 2024

Mkuu wa Idara ya Kilimo, Mifugo na Uvuvi wa Halmashauri ya Wilaya ya Singida Bi. Natalia Mosha ametoa wito kwa wakulima wa zao la Dengu wilayani humo kutumia mfumo wa Stakabadhi ya Mazao Ghalani kwani mfumo huo hutoa bei halisi ya soko na kumwongezea kipato zaidi mkulima

Bi. Mosha ameyasema hayo terehe 03/09/2024 katika ofisi za Halmashauri ya wilaya ya Singida Mwahango Kata ya Ilongero alipokuwa akitoa ufafanuzi wa mauzo ya Dengu yaliofanyika mwishoni mwa mwezi wa nane mwaka 2024 ambapo ameendelea kuwasisitiza wakulima kutumia mfumo wa Stakabadhi Ghalani huku akiahidi kuendelea kutoa elimu kuhusu faida ya mfumo huo kwa wakulima pamoja na namna unavyorahisisha uchangiaji wa mapato kwa Serikali.

“Mfumo upo vizuri kwa upande wa Halmashauri unatusaidia kupata mapato moja kwa moja kwa sababu unajua umeuza kiasi gani na umepata kiasi gani kwa hiyo Halmashauri tunajua kabisa tunapata kiasi gani kwa hiyo inaturahisishia na sisi kupata takwimu zile za kiasi cha Dengu iliyouzwa”

Halmashauri ya Wilaya ya Singida ina jumla ya Maghala makuu mawili  ambayo ni Mtinko na Mwasauya ambapo yanafanya kazi na vituo vya kukusanyia mazao katika kata zifuatavyo; Mtinko, Mudida, Mwasauya, Kinyeto, Msange, Mgori, Ngimu,ambavyo hutumika kukusanya na kusafisha dengu kabla ya kupelekwa katika ghala kuu, kisha mwendesha ghala huandaa Katalogi ya Mauzo ili kunadiwa na Soko la Bidhaa Tanzania (TMX) kila zinapotimia tani 20 au zaidi kwa wakati mmoja.

Naye Abasi Athuman kutoka kata ya Ngimu ambaye ni moja kati ya wakulima walioshiriki mnada wa mwisho wa mwezi wa nane ameshukuru uwepo wa mfumo huo ambao umemsaidia kupunguza gharama za usafirishaji pamoja na kuokoa gharama za ushuru wa zao hilo. Kwa upande wake Salim Juma (Mkulima wa Dengu) kutoka kata ya Mwasauya ameshukuru uwepo wa mfumo kwa sababu ya uwaishwaji malipo kwa mkulima mara baada tu ya mnada huku akitoa ushauri kwa serikali kutangaza mnada kwa haraka ili kusaidia mazao ya mkulima yasikae ghalani kwa muda mrefu na kupelekea kushawishika kuuza nje ya mfumo.

Jumla ya kilo za Dengu laki mbili na elfu arobaini na saba mia sita hamsini na nne (247,654) sawa na  Tani 248 zimeuzwa ndani ya mwezi wa nane mwaka 2024 huku pakiwa na ongezeko la idadi ya wakulima walioshiriki kutumia mfumo wa Stakabadhi ya Mazao Ghalani.