TIMU YA UKAGUZI KUTOKA OFISI YA MKUU WA MKOA WA SINGIDA, YAFANYA UKAGUZI WA MIRADI YA MAENDELEO.

Posted on: September 20th, 2025

Kaimu Katibu Tawala wa Mkoa wa Singida, upande wa usimamizi, ufuatiliaji na ukaguzi, Bw. Shabani Mongomongo, ameongoza timu ya ukaguzi kutoka katika Ofisi ya Mkuu wa Mkoa wa Singida, pamoja na wataalamu kutoka katika Ofisi ya Mkurugenzi Mtendaji wa Halmashauri ya Wilaya ya Singida, katika ukaguzi na ufuatiliaji wa miradi ya maendeleo inayotekelezwa ndani ya Halmashauri leo tarehe 20 Septemba, 2025. Zoezi la ukaguzi na ufuatiliaji limefanyika kwa miradi ya maendeleo iliyopokea fedha kutoka Serikali kuu, mradi wa SEQUIP uliopokea fedha kutoka kwa wadau wa maendeleo ambao ni mradi wa kuboresha elimu ya sekondari, na  mradi wa BOOST uliopokea fedha kutoka kwa wadau wa maendeleo, ambao ni mradi wa kuboresha elimu ya msingi, mradi wa TIMCHIP ambao ni mradi wa kupanua zahanati kuwa vituo vya afya ili kuimarisha huduma ya Mama na mtoto.

Ukaguzi huo umefanyika kwa lengo la kufuatilia na kuona ikiwa fedha zilizotolewa kwa ajili ya utekelezaji wa miradi hiyo, zimetumika kulingana na maelekezo yaliyotolewa, pia kuona kama miradi hiyo ina tija na  huduma zinatolewa kwa wananchi ipasavyo na lengo la serikali linafikiwa. Miradi iliyotembelewa ni pamoja na shule ya sekondari ya Ilongero, shule ya sekondari ya Amali Mssange, Hospitali ya Wilaya ya Singida, Kituo cha afya cha Ngimu, Shule za Msingi za Munkhola na Ughandi ambapo kwa ujumla miradi hii ilipokea fedha kwa mwaka wa fedha 2024/2025 na 2025/2026 kwa robo ya kwanza.