UFUNGUZI WA MAFUNZO KWA WASIMAMIZI WASAIDIZI WA UCHAGUZI, KWA NGAZI YA KATA

Posted on: August 4th, 2025

Mafunzo kwa Wasimamizi  Wasaidizi wa Uchaguzi kwa Ngazi ya Kata yamefunguliwa rasmi leo tarehe 4 Agosti,  2025 katika ukumbi mkubwa wa mikutano, uliopo katika Ofisi za Halmashauri ya Wilaya ya Singida, ikiwa ni maandalizi ya kuwezesha kutekeleza ipasavyo shughuli za Uchaguzi Mkuu utakaofanyika Tarehe 29, Oktoba 2025.

Akifungua Mafunzo hayo, Mgeni rasmi wa mafunzo hayo ambaye ndiye Msimamizi wa Uchaguzi Jimbo la Ilongero, Ndg. Nasoro Erasto Kitia, amewakumbusha washiriki wa mafunzo hayo kuwa, wameteuliwa kwa mujibu wa sheria, na yakuwa wanao wajibu wa kikatiba na kisheria kusimamia, kuratibu na kuendesha Uchaguzi wa Rais na  Wabunge wa Jamhuri ya Muungano wa Tanzania na Madiwani kwa upande wa Tanzania Bara, kwa niaba ya Tume Huru ya Taifa ya Uchaguzi.

“ Ndugu washiriki wa mafunzo, jukumu la kusimamia na kuratibu uendeshaji wa Uchaguzi wa Rais na Wabunge wa Jamhuri ya Muungano wa Tanzania, na Madiwani kwa upande wa Tanzania Bara, ni kubwa, nyeti na muhimu kwa mustakabali wa Taifa letu, hivyo mnategemewa kuzingatia utendaji wenu, muwajibike ipasavyo katika kipindi chote cha utumishi wenu kwa Tume hadi hapo mtakapokamilisha jukumu hili la Uchaguzi Mkuu” Alisema Ndg. Kitia.

Mafunzo hayo yanajumuisha washiriki 42 kutoka katika kata 21 za Halmashauri ya Wilaya ya Singida, ambapo kabla ya mafunzo kuanza kulitangulia zoezi la uapisho na uthibitisho, ambalo limesimamiwa na Hakimu Mkazi wa Wilaya ya Singida, Mhe. Anna Daniel Mbembela. Vilevile, jumla ya Mada 11 zitawasilishwa katika siku zote 3 hadi kufikia Tarehe 6 Agosti, 2025.