WAJASIRIAMALI WA HALMASHAURI YA WILAYA YA SINGIDA WANUFAIKA NA MAONESHO YA SABA YA MIFUKO NA PROGRAMU ZA UWEZESHAJI WA WANANCHI KIUCHUMI

Posted on: September 15th, 2024

Wajasiriamali kutoka Halmashauri ya Wilaya ya Singida wamepata fursa ya kujifunza na kukuza shughuli zao katika Maonesho ya Saba ya Mifuko na Programu za Uwezeshaji Wananchi Kiuchumi, yaliyoandaliwa na Baraza la taifa la Uwezeshaji wananchi kiuchumi (NEEC) kwa kushirikiana na mifuko ya uwezeshaji wananchi kiuchumi yaliyofanyika katika viwanja vya Bombadia, Mkoani Singida.

Maonesho hayo yaliyoongozwa na kauli mbiu “Shiriki katika uchaguzi wa serikali za mitaa, unufaike na fursa za uwezeshaji” yalianza tarehe 08/09/2024 na kuhitimishwa tarehe 14/09/2024 yakihudhuriwa na viongozi mbalimbali wa serikali, viongozi wa kisiasa, viongozi wa dini, mashirika ya kiserikali na yasiyo ya kiserikali, watendaji wa serikali, wajasiriamali na wananchi kwa ujumla.

Akizungumza katika hafla ya kuhitimisha maonesho hayo, mgeni rasmi Naibu Waziri Mkuu Mhe. Doto Biteko amepongeza kazi kubwa iliyofanywa na mifuko na programu mbali mbali za uwekezaji katika kuhamasisha wajasiriamali kuwekeza tangu mwanzo wa maonesho.

“Nimepita kwenye mabanda nimeona mlivyojitokeza kwa wingi ……. hii mifuko ya uwezeshaji wananchi kiuchumi wameeleza hapa kazi walioifanya kutoka mwanzo wa maonesho mpaka sasa wamefanya kazi kubwa na tunawapongeza sana.” Alisema Dkt. Biteko.

Pia Mhe. Dkt. Biteko alisisitiza juu ya ushiriki wa wananchi katika uchaguzi wa serikali za mitaa utakao fanyika tarehe 27/11/2024 kupitia kauli mbiu ya maonesho hayo.

“Kauli mbiu hii inaongeza hamasa kwa wananchi kujitokeza kwa wingi kwenye uchaguzi wa serikali za mitaa, unaotarajiwa kufanyika novemba 27 mwaka huu katika mikoa yote hapa nchini………nitumie fursa hii vilevile kuwakumbusha wananchi wote wenye sifa ya kuchaguliwa kushiriki kwenye uchaguzi huu wa serikali za mitaa. Napenda kutoa rai kwamba msifanye kosa kuchagua viongozi ambao hawana uchungu na maendeleo yetu na taifa kwa ujumla……uchaguzi huu sio uchaguzi mdogo, ni uchaguzi mkubwa kwa maendeleo ya nchi yetu.”Alisema Dkt. Biteko.

Kwa upande wake Bi Joahilia Nimu, mmoja wa wajasiriamali kutoka kata ya Kinyeto, Halmashauri ya wilaya ya Singida amesema maonesho hayo yamemsaidia kujifunza mambo mbalimbali kuhusiana na shughuli zake za ujasiriamali na yatakuwa msaada mkubwa katika kukuza biashara zake hata kuuza mazao na bidhaa nje ya mkoa wa Singida.

“Tumejifunza ujasiriamali, tumeona bidhaa mbalimbali, na sisi wakulima wa mbogamboga wametupa hamasa ya kulima kilimo chenye tija ili kuleta mafanikio kwa mfano, katika hizo mboga tunapaswa kutumia viuatilifu ili mazao yastawi vizuri, vilevile tunakumbwa na changamoto kubwa ya ukosefu wa mitaji hivyo tunahitaji kuwezeshwa.” Alisema Bi Joahilia Nimu.

Naye mjasiriamali wa ushonaji wa nguo Bi. Anuarite Constantine ameeleza namna alivyojifunza mitindo mbalimbali ya ushonaji sambamba na matumizi ya machine za kisasa za kushonea nguo.

“Mengi tumejifunza kutoka kwa wenzetu,tumejionea staili mbalimbali za nguo kwa upande wangu mimi kama mshonaji wa nguo na mfumaji wa masweta.” Alisema Bi. Anuarite Constantine.

Maonesho ya nane ya Mifuko na Programu za Uwezeshaji Kiuchumi yanatarajiwa kufanyika mwaka 2025 mkoani Mwanza, ikiwa ni makubaliano kati ya Baraza la Taifa la Uwezeshaji Wananchi Kiuchumi (NEEC) na wawakilishi wa mikoa yote ya Tanzania bara ambao ni marafiki wa uwezeshaji wananchi kiuchumi.