WAKUU WA WILAYA, SINGIDA NA HANANG WAFANYA ZIARA YA KUANGALIA MIPAKA KATI YA WILAYA HIZO

Posted on: September 23rd, 2024

Mkuu wa wilaya ya Singida Mhe. Godwin Gondwe akishirikia na mkuu wa wilaya ya Hanang Mhe. Almishi Issa wamefanya ziara kazi ya kutembelea Hifadhi ya msitu wa Mgori unaojumuisha kata ya Mughunga na Ngimu zilizopo wilayani Singida pamoja na Lalaji iliyopo wilaya ya Hanang, lengo likiwa ni kuona mipaka halisi ya hifadhi hiyo pamoja na kusikiliza kero za wananchi wa vijiji vinavyopakana na hifadhi.

Ziara hiyo imefanyika leo Septemba 23, 2024 Wilaya ya Hanang Mkoani Manyara ikihusisha kamati za usalama, wataalamu wa ardhi wa mikoa yote miwili, madiwani wa kata zote tatu, wenyekiti wa vijiji vinavyopakana na hifadhi hiyo, pamoja na Mwenyekiti na Mkurugenzi wa Halmashauri ya Wilaya ya Singida ambao kwa pamoja wamefika uwanadani kuangalia mipaka na kuongea na wananchi kuhusu mgogoro huo.

Akizungumza katika ziara hiyo Mhe. Gondwe amewomba wataalamu wa ardhi wa wilaya zote mbili kwa kushirikiana na Wakala wa Huduma za Misitu Tanzania kubainisha mpaka wa Msitu, kutoa elimu kwa wananchi ili kuzitambua sheria za misitu lakini pia ametoa rai kwa wananchi kuwa wavumilivu wakati serikali ikiendelea na utatuzi wa mgogoro huo.

“Mpaka wa msitu ujulikane, sheria za msitu tuzifahamu, tukitaka kubadilisha sasa kwa sababu huu ni mpaka wa msitu na wala sio mpaka wa kimkoa kwa hiyo lazima vigezo na masharti kuzingatiwa muanze michakato midogo midogo  kuanzia chini hadi juu ndio mambo yafanikiwe.” Alisema Mhe. Gondwe

Kwa upande wake mkuu wa Wilaya ya Hanang Mhe. Almishi Issa amewaomba wataalamu wa ardhi kutumia ujuzi wao kuongoza katika zoezi hilo la utatuzi wa mgogoro huo wa mpaka.

Pia, katika ziara hiyo wananchi wamehamasishwa kujitokeza kwa wingi kushiriki katika uchaguzi wa serikali za mitaa ifikapo Novemba 2024.