WALIMU WA SOMO LA KIINGEREZA WAPATIWA MAFUNZO

Posted on: January 29th, 2025

Walimu wa somo la Kiingereza katika Shule zote 102 za Msingi za Halmashauri ya Wilaya ya Singida wamepatiwa Mafunzo ya kuimarisha ujifunzaji na ufundishaji wa somo la kiingereza kuanzia  leo tarehe 29/01/2025 katika ukumbi wa kituo cha Walimu Singida. Mafunzo hayo ya siku tatu, yameandaliwa na Serikali kwa kushirikiana  na Mradi wa Shule Bora na kuratibiwa na Idara ya Elimu Msingi ya Halmashauri ya Wilaya ya Singida, na kutolewa na wawezeshaji ambao wanatoka miongoni mwa Walimu hao, wakitumia njia mbalimbali za uwasilishaji, kama, kujadiliana katika makundi na kuonyesha kwa vitendo.Lengo la mafunzo hayo ni kuwawezesha Walimu hao kuendana na Mtaala mpya wa somo la kiingereza wa mwaka 2023, ili waweze kujengewa uwezo katika kuwafundisha wanafunzi kwenye Shule zao.

Akitoa salamu kabla ya mafunzo kuanza, Mthibiti ubora wa Elimu, Wilaya ya Singida, Bi.Mary D. Maanga amewashauri Walimu hao kuendelea kuwa kama jumuia ya wasomi wa somo la Kiingereza, ambapo watapata nafasi ya kushirikishana changamoto wanazokumbana nazo katika ufundishaji,ili waweze kusaidiana.

“ Hii ni aina ya jumuia ya wasomi wa kiingereza,hivyo nataka kumtia moyo mratibu wa jumuia hii,kuunda kundi ambalo mtakuwa mkishirikishana changamoto zinazowakabili pindi mnapofundisha somo hili mashuleni kwenu.Nafikiri itakuwa ni jukwaa zuri la kupata usaidizi mzuri,kwani unaweza kuwa na changamoto kwenye eneo fulani na ukapata Mwalimu mwingine ambaye anaweledi katika eneo hilohilo, hivyo utapata usaidizi katika changamoto yako.Kwahiyo, nataka mfanye hili jukwaa kuwa la kudumu kuhusiana na ufundishaji wa somo la kiingereza.” Alisema Bi.Mary, akizungumza kwa lugha ya kiingereza.

Katika Mafunzo hayo Walimu wamepata nafasi ya kujifunza  mada mbalimbali zikiwemo, matumizi ya Teknolojia katika ufundishaji, sifa za Mwalimu bora wa somo la kiingereza na jinsi ya kuwafundisha wanafunzi ili kuwaongezea ujuzi wa matamshi ya lugha hiyo katika namna ya kuzungumza na kusikia, pia kusoma na kuandika.