"WANAWAKE TUWE WATOAJI TAARIFA WA KWANZA, TUONAPO TUKIO LOLOTE LA UKATILI WA KIJINSIA"

Posted on: March 4th, 2025

"Wanawake tuwe watoaji taarifa wa kwanza, tuonapo tukio lolote la ukatili wa kijinsia.”

Hayo yameelezwa na Mhe. Julieth Mchawa, Diwani wa Viti maalum kwa tiketi ya Chama cha Mapinduzi (CCM) katika Kata ya Mgori, ambaye pia alikuwa ni mgeni rasmi, leo katika maadhimisho ya siku ya Wanawake duniani yaliyofanyika kwa ngazi ya Halmashauri, katika Kata ya Mgori. 

Akitoa hotuba ya mgeni rasmi, Mhe. Julieth amewasisitizia Wanawake kuwa mstari wa mbele kutoa taarifa katika vyombo vya Sheria, pindi yanapotokea matukio ya ukatili wa kijinsia katika Jamii.

“ Tusisite kutoa taarifa pindi unapoona mtoto anafanyiwa ukatili, hata akina Mama wenzangu, tunafanyiwa ukatili katika majumba yetu, naomba toa taarifa kwasababu Mama Samia amerahisisha mfumo wa wanasheria wasaidizi. Andika kimemo, andika meseji, peleka ziwafikie wataalamu hawa, na tatizo lako litakuwa limefika” Alisema Mhe. Julieth Mchawa.

Vilevile, wanawake wameaswa kuhusiana na suala la malezi ya watoto, kwa kuzingatia maadili mema, ambapo Mhe. Julieth amewaasa Wanawake kujiheshimu na kuwa mfano bora kwa watoto wao.

“ Tuendelee kujiheshimu, hakuna kitu cha maana kama heshima. Uwe kiongozi mkubwa sana lakini usipojiheshimu, bado itakuwa ni hasara. Na utakapojiheshimu wewe kiongozi kama Mama na Mtoto atafuata matendo ya mama kujiheshimu” Alisema Mhe. Julieth Mchawa.

Pamoja na hayo, sherehe hizo zilipambwa na burudani mbalimbali kutoka kwa kina Mama na wanafunzi wasichana kwa  wavulana, burudani kama vile maigizo, nyimbo, ngoma za asili, utenzi na kucheza muziki.