WATENDAJI WA VIJIJI NA KATA, HALMASHAURI YA WILAYA YA SINGIDA WAPEWA MAFUNZO YA MIFUMO YA PLANREP NA FFARS

Posted on: February 25th, 2025

Watendaji wa vijiji na kata kutoka Halmashauri ya Wilaya ya Singida pamoja na wahasibu wao wamepatiwa mafunzo ya Mfumo wa Malipo kwa Kiwango cha Kituo (FFARS) na Mfumo wa Mipango na Bajeti (PlanRep). Mafunzo haya ya siku mbili yalianza leo, 25 Februari 2025, na yanatarajiwa kukamilika kesho, 26 Februari 2025.

Akifungua mafunzo hayo, Mwenyekiti wa Halmashauri ya Wilaya ya Singida, Mhe. Elia Digha, amewataka washiriki kuhakikisha wanazingatia taratibu ili kuongeza uwazi na ufanisi katika ukusanyaji na matumizi ya mapato kwenye maeneo yao ya kazi.

“Nendeni mzingatie utaratibu na mtumie mifumo hii, na kila mtu azingatie wajibu wake. Wote tulitumia mfumo tumeona faida yake taarifa zako zote zinaonekana kilichotumika na kiasi kilichopo benki. Kupitia hii mipango mingi itaenda kufanikiwa.“

Mafunzo haya yamelenga kuwawezesha watendaji kutumia mifumo hiyo kwa ufanisi zaidi katika upangaji wa bajeti na usimamizi wa rasilimali, kuhakikisha uwajibikaji na uwazi katika utendaji wa kazi zao.