ZIARA YA UKAGUZI WA MRADI WA UJENZI WA KITUO CHA AFYA, NGIMU

Posted on: March 3rd, 2025

Mwenyekiti wa Halmashauri ya Wilaya ya Singida, Mhe. Elia Digha amefanya ziara ya ukaguzi wa mradi wa ujenzi wa kituo cha Afya cha Ngimu, unaotekelezwa katika kata ya Ngimu, leo tarehe 03/03/2025. Akiambatana na timu ya wataalamu kutoka Ofisi ya Mkurugenzi Mtendaji wa Halmashauri, Mhe. Digha amepata nafasi ya kukutana na mtendaji wa kata na kijiji cha Ngimu, Diwani wa kata hiyo, Waganga wafawidhi wa kituo hicho pamoja na wasimamizi na mafundi wa mradi huo, ambapo kutokana na changamoto kadha wa kadha alizozibaini katika mradi huo, Mhe. Digha ametoa maagizo kadhaa kuhusiana na utekelezaji wa mradi, ikiwemo kuhakikisha wananchi wanashirikishwa katika ujenzi wa kituo chao cha Afya, vifaa vya ujenzi kufika kwa wakati na watendaji wafanye kazi kwa kujitoa ili mradi huo umalizike kwa wakati.

Mradi ulianza kutekelezwa rasmi tarehe 3/2/2025, ambapo jumla ya  majengo matano yameanza kujengwa, nayo ni Jengo la Mama na Mtoto, Maabara, Jengo la kufulia, Jengo la wagonjwa wa nje na vyoo, pamoja na Shimo la kuchomea taka hatarishi. Vilevile, mradi huu unagharimu kiasi cha Shilingi Milioni 686,779,126/= fedha ambazo zimetolewa na Benki ya Dunia.