ZOEZI LA UGAWAJI WA VIFAA KWA WATOTO WENYE MAHITAJI MAALUMU LAFANYIKA KATIKA KATA YA ILONGERO

Posted on: November 15th, 2024

Zoezi la ugawaji wa vifaa kwa watoto wenye mahitaji maalumu, ikiwemo watoto wenye ualbino, uoni hafifu, na ulemavu wa akili, limefanyika leo tarehe 15 Novemba, 2024, katika Kituo cha Walimu kilichopo Kata ya Ilongero, Halmashauri ya Wilaya ya Singida.

Akizungumza katika hafla hiyo, Diwani wa Kata ya Ilongero, Mhe. Issa Mwiru, aliwapongeza walimu kwa kazi kubwa wanayoifanya katika kuwahudumia wanafunzi wenye mahitaji maalumu na aliwashukuru wadau na taasisi mbalimbali kwa misaada wanayotoa ili kuboresha huduma kwa watoto na wanafunzi hao. Mhe. Mwiru alisisitiza umuhimu wa kuendelea kuweka mikakati madhubuti ya kuwahudumia watoto hawa ili kuhakikisha wanapata haki ya kupata elimu bora.

Naye, mgeni rasmi katika tukio hilo, Afisa Tarafa wa Ilongero, Bi. Sharifa Mfala, alitoa rai kwa maafisa elimu na walimu kuendelea kuhamasisha wazazi wa watoto wenye mahitaji maalumu kuwa wazi kuhusu hali ya watoto wao na kuwapelekea shule kwa mapema. Alihimiza jamii kuepuka tabia ya kuwaficha watoto hawa, akiongeza kuwa atafanya kila liwezekanalo kutatua changamoto mbalimbali zinazokumba utoaji wa huduma kwa watoto wenye mahitaji maalumu katika Tarafa ya Ilongero.