ZOEZI LA UTOLEWAJI WA NOTISI YA SIKU 90 ZA KUONDOKA KATIKA HIFADHI YA MSITU WA MUNKHOLA KWA WANANCHI LAFANYIKA KATA YA MGORI NA MUGHAMO

Posted on: January 17th, 2025

Zoezi la utolewaji wa Notisi ya siku 90 za kuondoka katika hifadhi ya Msitu wa Munkhola,kwa wananchi wa Kata ya Mgori na Mughamo waliovamia maeneo mbalimbali ya hifadhi hiyo, limemalizika leo tarehe 17/1/2025, ikiwa ni utekelezaji wa maazimio ya mkutano wa wananchi na Mkuu wa Wilaya ya Singida, Mhe Godwin Gondwe uliofanyika  tarehe 10/1/2025 katika Kijiji cha Munkhola.

Zoezi hilo lililofanyika kwa siku mbili kuanzia siku ya jana, limetekelezwa na Halmashauri ya Wilaya ya Singida,kwa kupitia Timu ya Wataalamu wa Kitengo cha Maliasili na Uhifadhi wa Mazingira pamoja na Kitengo cha Usafi wa Mazingira kutoka katika Ofisi za Halmashauri, wakishirikiana na Afisa kutoka Wakala wa Huduma za Misitu  Tanzania (TFS) pamoja na Askari kutoka Jeshi la  Polisi la Wilaya ya Singida wakiongozwa na Viongozi wa Halmashauri ya Kijiji cha Munkhola.

Zoezi hilo limehusisha ubandikwaji wa Nakala ya Notisi katika maeneo mbalimbali ndani na nje ya hifadhi na uwekwaji wa Alama ya "Bomoa" na "X", katika kila Nyumba iliyojengwa ndani ya hifadhi,ambapo wananchi walioanzisha makazi yao ndani ya hifadhi kinyume cha Sheria,na kufanya shughuli mbalimbali za kibinadamu ikiwemo ufugaji, kilimo na kuchoma mkaa, wanatakiwa kuondoka kwa hiari ndani ya siku 90, kuanzia tarehe 10/1/2025 hadi tarehe 10/4/2025. Lengo la kuchukuliwa kwa hatua hiyo, ni kuimarisha uhifadhi wa Misitu na Maliasili zilizopo hifadhini, ili kukabiliana na mabadiliko ya Tabia ya Nchi.