MAAFISA MAENDELEO SINGIDA WATOA ELIMU YA MIKOPO KWA VIJANA

Posted on: January 9th, 2026

Maafisa Maendeleo kutoka Halmashauri ya Wilaya ya Singida, jana tarehe 08 Januari 2026, wamefanya ziara katika kata za Ntonge na Msisi kwa lengo la kutoa elimu na kuhamasisha vijana kushiriki katika fursa za kiuchumi.

Katika ziara hiyo, vijana walielimishwa kuhusu mikopo ya asilimia 10 ya Halmashauri, uundaji na usajili wa vikundi, pamoja na umuhimu wa urejeshaji wa mikopo kwa wakati. Pia walipatiwa elimu kuhusu VICOBA na fursa za mikopo kupitia Benki ya NMB. Ilielezwa kuwa zaidi ya shilingi milioni 700 tayari zimetolewa kwa vikundi vya vijana, wanawake na watu wenye ulemavu. Aidha, maafisa hao walisikiliza changamoto za vijana ikiwemo changamoto za mtaji, uelewa mdogo wa taratibu za mikopo na upatikanaji wa masoko. Pia vijana walihimizwa kutumia fursa zilizopo kwa maendeleo yao na ya Halmashauri.