MWENYEKITI WA HALMASHAURI YA WILAYA YA SINGIDA ATOA ELIMU YA UKUSANYAJI WA MAPATO KATA YA MSISI

Posted on: January 9th, 2026

Mwenyekiti wa Halmashauri ya Wilaya ya Singida, Mhe. Elia Digha, amefanya ziara ya kikazi katika Kata ya Msisi yenye lengo la kutoa elimu kwa wananchi kuhusu umuhimu wa ukusanyaji wa mapato katika kuharakisha maendeleo ya halmashauri. Katika ziara hiyo, Mhe. Digha alitembelea vijiji vya Nkwae, Ntondo na Mnug’una, ambapo pamoja na kutoa elimu, alipata fursa ya kusikiliza kero na migogoro mbalimbali inayowakabili wananchi wa maeneo hayo ili kutafutiwa ufumbuzi.

Akizungumza na wananchi, Mhe. Digha aliwasisitiza umuhimu wa kulipa ushuru unaokusanywa kupitia leseni za biashara, magulio na minada, akieleza kuwa mapato hayo ni chanzo muhimu cha fedha kinachowezesha utekelezaji wa miradi ya maendeleo katika kata na wilaya kwa ujumla.

Aidha, aliwahimiza wananchi kuhakikisha wanapima na kumiliki maeneo yao kisheria, akibainisha kuwa hatua hiyo itaongeza thamani ya ardhi na kusaidia kuondoa migogoro ya ardhi katika jamii. Ziara hiyo ni sehemu ya jitihada za halmashauri katika kuhamasisha ushiriki wa wananchi kwenye maendeleo yao kupitia ulipaji wa mapato na matumizi sahihi ya rasilimali zilizopo.