TUME HURU YA UCHAGUZI YAWEKA WAZI RATIBA YA UCHAGUZI MKUU MWAKA 2025

Posted on: July 26th, 2025

Mwenyekiti wa Tume Huru ya Taifa ya Uchaguzi (INEC), Jaji wa Mahakama ya Rufani, Jacobs Mwambegele, ameweka wazi ratiba ya Uchaguzi Mkuu wa mwaka 2025 wa Rais, Wabunge katika Jamhuri ya Muungano na Madiwani kwa Tanzania Bara.

Akizungumza leo Julai 26, 2025 katika viunga vya Makao Makuu ya Tume hiyo jijini Dodoma, Jaji Mwambegele amesema Agosti 9 hadi Agosti 27, 2025 itakuwa ni kipindi cha kutoa fomu za uteuzi wa wagombea wa kiti cha Rais na Makamu wa Rais.Ameeleza pia kuwa Agosti 14 hadi Agosti 27, 2025 itakuwa ni kipindi mahususi cha utoaji wa fomu za uteuzi wa wagombea ubunge na udiwani, huku Agosti 27, 2025 ikiwa ni siku ya uteuzi wa wagombea wa kiti cha Rais, Makamu wa Rais, ubunge na udiwani.

Sambamba na hilo, ameongeza kuwa Agosti 28 hadi Oktoba 27, 2025 ni kipindi cha kampeni kwa Tanzania Bara na Zanzibar ili kupisha kura ya mapema. Aidha, amesema Oktoba 29, 2025, siku ya Jumatano, ndiyo itakuwa siku ya kupiga kura.