KAMATI YA FEDHA, MIPANGO NA UCHUMI KATIKA ZIARA YA KUKAGUA MIRADI YA MAENDELEO

Posted on: November 1st, 2023

Mwenyekiti wa Kamati ya fedha , mipango na uchumi ambaye pia ndiye Mwenyekiti wa Halmashauri ya Wilaya Singida na diwani wa kata ya Msange Mhe. Elia Digha amewataka watumishi wa idara ya afya kuzingatia misingi na taratibu za utoaji huduma bora kwa wagonjwa.

Ameyasema hayo Oktoba 31, 2023 pindi kamati hiyo lipofanya ziara ya kukagua ukamilishaji wa jengo la upasuaji na jengo la wodi ya upasuaji ya wanaume katika Hospitali ya Halmashauri ya Wilaya  Singida iliyopo kata ya Ilongero.

Akisoma taarifa ya ukamilishaji wa majengo  Mganga Mfawidhi wa Hospitali hiyo Dr. Yusuph Kitinya amesema mpaka sasa hospitali ina jumla ya watumishi 45 na inatoa huduma kwa wagonjwa wa nje na ndani, maabara, kliniki ya afya ya uzazi, mama na mtoto, huduma ya kujifungua na huduma za upasuaji wa dhalula. Aidha ujenzi wa majengo mawili ya upasuaji ulitengewa kiasi cha Tshs. 424,612,750.00 kutoka serikali kuu na mpaka sasa kiasi cha Tshs. 399,520,730.00 kimeshatumika.

Katika kuunga mkono jitihada za serikali katika ujenzi wa miradi ya maendeleo Halmashauri ya Wilaya ya Singida imetoa fedha kiasi cha milioni 33 kutoka mapato yake ya ndani kati ya shilingi milioni 43 zilizotumika katika ujenzi wa wodi ya wagonjwa mahututi (ICU) mara baada ya kukataliwa kwa msamaha wa kodi ya ongezeko la thamani (VAT) ambapo fedha hizo zimetumika kulipia gharama za mafundi, manunuzi ya vifaa vya umaliziaji wa ujenzi wa majengo hayo.

Hata hivyo idara ya ujenzi na kitengo cha manunuzi ya umma katilka Halmashauri ya Wilaya ya Singida imetakiwa kuongeza umakini katika utendaji kazi kwa kuzingatia sheria, taratibu na kanuni za manunuzi ya umma na hivyo kuhakikisha majengo yanakamilika kwa wakati.

Aidha Mhe. Digha amemuagiza Mkurugenzi Mtendaji wa Halmashauri ya Wilaya ya Singida Bi. Ester Chaula kuhakikisha miradi yote ya umaliziaji wa ujenzi iwe imekamilika ndani ya wiki mbili tayari kwa kukabidhiwa.