MHE. GONDWE AFANYA ZIARA YA KIKAZI KATA YA MUGHUNGA

Posted on: September 18th, 2024

Mkuu wa wilaya ya Singida Mhe. Godwin Gondwe akiongozana na kamati ya ulinzi na usalama ya wilaya pamoja na baadhi ya watendaji wa Halmashauri ya Wilaya ya Singida wamefanya ziara ya kikazi katika kata ya Mghunga leo tarehe 18/9/2024 kwa lengo la kukutana na wananchi na kusikiliza changamoto zao.

Akikaribisha ugeni huo mbele ya wananchi wa Kijiji cha Nduamghanga, diwani wa kata ya Mghunga, Mhe. Hassan Mtinangi aliipongeza serikali kwa kutekeleza miradi mbalimbali ya maendeleo ikiwemo afya, elimu na umeme. Pia alizungumzia mgogoro uliopo katika kata hiyo ukihusisha mpaka kati ya Kijiji cha Nduamghanga kilichopo katika Halmashauri ya Wilaya ya Singida na Kijiji cha Wairu kilichopo katika wilaya ya Chemba mkoa wa Dodoma, ambapo changamoto hiyo imekuwa ikiathiri shughuli za upigaji kura kila mara msimu wa uchaguzi unapofika.

“Huo mpaka tunaogombania, wenzetu wale wanatuhadaa bure, kutoka Wairu wanasema kwamba hapa ni kwao lakini lahasha hapa si kwao, sasa wao wanahadaiwa na watu baadhi na wapo ndani ya eneo letu,sasa kama tutakuwa huyu hapa wa Chemba huyu hapa wa Singida, hapa tutafanyaje kazi ya utendaji?” Alizungumza Mheshimiwa Mtinangi.

Vilevile Mkuu wa wilaya ya Singida alipata nafasi ya kusikiliza kero za wananchi na kuzitolea maelekezo ambapo changamoto kubwa imeoneka kuwa ni mipaka baina ya vijiji na mipaka baina ya maeneo ya wananchi na hifadhi na misitu. Mhe. Gondwe alipata nafasi ya kutoa maelekezo juu ya namna ya utatuzi na kutoa wito juu ya uchaguzi wa serikali za mitaa.

 “Mimi na wenzangu tumeona kwa macho, hivyo tukubaliane kuwa tumelipokea kwa namna ya pekee na tukaone utaratibu mzuri wa kulifanyia kazi ili usiathiri upigaji wa kura katika kitongoji cha Ukombozi. Naomba msijichukulie sheria mkononi mkagombana na wenzetu wa jirani,wale ni jirani zetu. Pia, tujiandikishe kwenye orodha ya kupiga kura, kuanzia tarehe 25 mwezi huu itaenda mpaka tarehe 1 Oktoba, naomba mjiandikishe, mjitokeze na mkijiandikisha msikose kupiga kura tarehe 27 Novemba mwaka huu. Kuhusu suala la msitu, maelekezo ni kama ifuatavyo; kwanza, mpango wakuendelea kutengeneza mipaka ile kama mlivyopanga washirikisheni wananchi wa eneo hili kupitia kwa viongozi, ili kuondoa hizi changamoto.…..Pili, tunapoendelea kutatua changamoto hii nawaomba tuvumiliane, tuache uchochezi maana huo sio utanzania, nchi yetu ni ya amani na mimi nawahakikishia usalama katika wilaya yetu ya Singida.”