WAZIRI WA HABARI, MAWASILIANO NA TEKNOLOJIA YA HABARI, MHE. JERRY SILAA, AZINDUA MNARA WA MAWASILIANO YA SIMU KATA YA MAKURO

Posted on: October 26th, 2024

Waziri wa Habari, Mawasiliano na Teknolojia ya Habari Mhe. Jerry Silaa (Mb) azindua mnara wa mawasiliano ya simu uliojengwa katika kata ya Makuro, Halmashauri ya Wilaya ya Singida. Akiongea katika uzinduzi huo Mhe. Silaa amesema, wananchi takriban 15,613 wa Kata ya Makuro na maeneo ya jirani wataanza kupata huduma ya mawasiliano ya simu ya uhakika kufuatia kukamilika kwa mnara uliojengwa na kampuni ya Airtel kwa ruzuku inatolewa na Serikali kupitia Mfuko wa Mawasiliano kwa Wote (UCSAF) kiasi cha shilingi milioni 115.

Akiwasilisha Taarifa ya utekelezaji wa mradi huo, Mtendaji Mkuu wa Mfuko wa Mawasiliano kwa Wote (UCSAF), Mhandisi Peter Mwasalyanda amesema, awali mnara huo ulikuwa unatoa huduma kwa teknolojia ya 2G pekee ambayo huwezesha watumiaji kuwasiliana kwa kupiga simu za sauti na kutuma ujumbe mfupi yaani SMS tu, lakini kuanzia tarehe 24 Oktoba, 2024 mnara huo uliongezewa teknolojia ya 3G na 4G ili kuwezesha matumizi ya huduma za mtandao wa intaneti kupitia simu na vifaa vingine.

Aidha, Mhandisi Mwasalyanda ameongeza kuwa, kupitia Mradi wa Tanzania ya Kidijitali (DTP), ambao una jumla ya minara 758 inayojengwa katika kata 713 nchini, Mkoa wa Singida una jumla ya minara 33 inayojengwa katika wilaya za Ikungi, Iramba, Manyoni, Mkalama na Singida.

Kwa upande wake Mkuu wa Mkoa wa Singida Mhe. Halima Dendego, ametoa wito kwa wananchi kuutunza mnara huo kwa kuwa kuongezwa teknolojia ya 3G na 4G kutafungua fursa mbalimbali kwa wananchi wa Kata hiyo na kuchochea maendeleo ya kijamii na kiuchumi.

Mnara huu utahudumia vijiji vya Mikuyu, Mwalala, Matumbo, Mkenge na Makuro. Aidha utahudumia pia wananchi wa vijiji vya jirani vya Sekotoure, Msimihi na Mjughuda.