WATUMISHI WA HALMASHAURI YA WILAYA YA SINGIDA WAPEWA MAFUNZO YA MFUMO WA NEST

Posted on: January 21st, 2025

Mafunzo ya Mfumo wa Kielektroniki wa Ununuzi wa Umma (NeST),yametolewa kwa watumishi mbalimbali wa Halmashauri ya Wilaya ya Singida wakiwemo, Waalimu wakuu wa Shule za Msingi na Sekondari,Waganga Wafawidhi wa Hospitali, Zahanati na Vituo vya Afya pamoja na Maafisa Watendaji Kata kuanzia siku ya jana tarehe 20/1/2025,lengo ikiwa ni kuongeza ufanisi na uaminifu katika kufanya manunuzi Serikalini.

Mafunzo hayo ya siku mbili,yametolewa na wawezeshaji kutoka Mamlaka ya Udhibiti na Ununuzi wa Umma (PPRA) Kanda ya kati na Magharibi,ambapo watumishi hao wamepata nafasi ya kufundishwa namna ya kutumia mfumo huo wa manunuzi  na kuelezea changamoto wanazo kumbana nazo pindi watumiapo mfumo huo,na kupatiwa majibu juu ya changamoto hizo.

Akifunga mafunzo hayo, Kaimu Mkurugenzi wa Halmashauri ya Wilaya ya Singida, Bi Janeth Mbugha,amewashukuru Wawezeshaji na kuwapongeza Watumishi wote waliohudhuria mafunzo,na kuwasisitizia watumishi hao kwenda kuwashirikisha watumishi walio chini yao, kile walichojifunza, ili kila mmoja awe na ujuzi wa kutumia mfumo huu pindi wanapohitaji kufanya manunuzi katika Idara au Vituo vyao vya kazi.

“Ukirudi peleka Mrejesho.Na itakuwa jambo jema zaidi kama mtaitana kama menejimenti,mkashirikishana haya yaliyopo.Kama leo niko hapa, kesho huwezi jua, mimi sina garantii ya maisha yangu,lakini kama nimewaelekeza wenzangu, kazi inaendelea.” Alisema Bi Janeth.

Mafunzo haya yamemalizika rasmi leo ikiwa ni siku ya pili,ambapo wakuu wa Idara na Vitengo pamoja na baadhi ya wasaidizi kutoka katika Ofisi ya Mkurugenzi wa Halmashauri, nao wamepatiwa mafunzo hayo.